ڈائریکٹر اسٹیٹ اینڈ انفورنسمنٹ کی سربراہی میں کورنگی میں قائم تجاوزات کے خلاف بڑے پیمانے پر کارروائی ۔
	21-Dec-2017
	ڈائریکٹر جنرل ادارہ ترقیات کراچی سمیع الدین صدیقی کی خصوصی ہدایت کی روشنی میں متعلقہ محکمہ اسٹیٹ اینڈ انفورنسمنٹ کا عملہ شہر بھر میں کے ڈی اے اراضی پر قائم غیر قانونی تعمیرات کو مسمار کرنے کے لئے بھرپور قوت سے بلا تفریق آپریشن کررہا ہے۔ واضح رہے کہ سپریم کورٹ کی ہدایت اور حکومت سندھ کے تعاون سے ڈائریکٹر جنرل ادارہ ترقیات کراچی سمیع الدین صدیقی بذات خود آپریشن کی مانیٹرنگ کررہے ہیں۔ ڈائریکٹر اسٹیٹ اینڈ انفورنسمنٹ کی سربراہی میں کورنگی میں قائم تجاوزات کے خلاف بڑے پیمانے پر کارروائی کی گئی۔آج کورنگی سیکٹر 43-B اور 44-B میں رفاہی پلاٹس پر قائم غیر قانونی کمرشل پلاٹس، تھلے اور شادی ہالز جبکہ لانڈھی 36-B میں پلے گرائونڈ کے لئے مختص کی گئی کے ڈی اے اراضی پر قائم شادی ہالز پولیس، رینجرز اور مقامی انتظامیہ کی موجودگی میں بھاری مشینری کے ذریعے مسمار کردیئے گئے،واگزار کرائی گئی کے ڈی اے اراضی پر مستقبل قریب میں قبضہ مافیا سے محفوظ رکھنے کے لئے فی الفور نگرانی نظام نافذ کردیا گیا ہے۔ واضح رہے کہ ڈی جی کے ڈی اے سمیع الدین صدیقی نے ڈائریکٹر اسٹیٹ اینڈ انفورنسمنٹ رضا محمد قائم خان کو آپریشن مزید تیز کرنے کی ہدایات جاری کی ہیں۔ آپریشن کے دوران ڈائریکٹر اسٹیٹ اینڈ انفورنسمنٹ رضا محمد قائم خانی کے ہمراہ ایگزیکٹو انجینئر کورنگی و دیگر افسران موجود تھے۔