Welcome to Karachi Development Authority
Mon to Fri - 9am to 5pm
Civic Center, Karachi
info@kda.gos.pk
Click Here
وزیر بلدیات سندھ سعید غنی نے کہا ہے کہ کراچی میں کروڑوں لوگ آباد ہیں اور بدقسمتی سے ہمارے پاس کوئی ماسٹر پلان نہیں ہے۔ پاکستان بننے سے قبل اور بعد میں اب تک کراچی کے 5 ماسٹر پلان بنائے گئے لیکن کوئی نہ کوئی وجہ کے باعث ان پر عمل درآمد نہیں ہوسکا۔ کراچی شہر کے لئے ایک جامع ماسٹر پلان ضروری ہے، جس کے لئے گریٹر کراچی ریجنل پلان 2047 ء کا آغاز کیا گیا ہے جو اگست 2026ء تک مکمل کرلیا جائے گا۔ ان خیالات کا اظہار انہوں نے محکمہ بلدیات سندھ اور کے ڈی اے سمیت مختلف انٹرنیشنل کنسلٹنٹ کے ساتھ تیار کئے جانے والے ”گریٹر کراچی ریجنل پلان 2047ء“ کی افتتاحی تقریب میں بحیثیت مہمان خصوصی خطاب کرتے ہوئے کیا۔ تقریب میں ڈی جی کے ڈی اے الطاف گوہرمیمن، پروجیکٹ ڈائریکٹر محمد ارشد خان، چیف انجینئر کے ڈی اے صمد جمالانی، سپرنٹنڈنٹ انجینئر محیب اللہ جعفری، پروجیکٹ منیجر ڈیوڈ گونری، ٹیم لیڈر دارالجدسہ انٹرنیشنل کنسلٹنٹ رامی بیٹرون، انجینئر سی ای او ایشین کنسلٹنٹ فرم انجینئر ارسلان حنیف و دیگر بھی موجود تھے۔ تقریب سے خطاب کرتے ہوئے صوبائی وزیر سعید غنی نے کہا کہ یہ میرے لئے بے حد اعزاز اور فخر کی بات ہے کہ میں آپ سب کو آج کی اس یادگار تقریب میں خوش آمدید کہوں کیونکہ آپ تمام کراچی کے مستقبل کیلئے پُرعزم ہیں، جو نہ صرف پاکستان کا اقتصادی مرکز ہے بلکہ استقامت، تنوع اور ترقی کی علامت بھی ہے۔ انہوں نے کہا کہ ماضی میں کراچی کیلئے چھ ماسٹر پلان بنائے جا چکے ہیں، 1923، 1948، 1952، 1974، 1991 ء اور 2007 ء میں۔ آخری منصوبہ، جسے کراچی اسٹریٹیجک ڈیولپمنٹ پلان 2020ء کا نام دیا گیا تھا، مختلف وجوہات کی بنا پر مکمل طور پر نافذ نہیں ہو سکا، واٹر کمیشن نے 2018ء میں سیکرٹری پلاننگ اینڈ ڈویلپمنٹ کے ذریعے جب میں اس وقت بھی وزیر بلدیات تھا کہا کہ 2020 ء میں ختم ہونے والے ماسٹر پلان کو نوٹی فائی کریں، اس وقت بھی میں نے انہیں بتایا کہ نئے ماسٹر پلان بنائیں لیکن مجھ سے اپنی بات منوائی گئی اور اس کو نوٹیفائیڈ کروایا گیا جو دو سال بھی پورے نہ کرسکا۔ سعید غنی نے کہا کہ اس مرتبہ ہم نے کوشش کی ہے کہ ماسٹر پلان کو اوپن رکھیں اور اسے 2047 ء کا نام پاکستان کے 100 سال مکمل ہونے کی نسبت سے دیا گیا ہے۔ انہوں نے کہا کہ اس منصوبے پر اکتوبر 2024 ء سے کام شروع کیا گیا ہے اور آج اس کی افتتاحی تقریب منعقد کی جارہی ہے اور یہ دو سال یعنی اگست 2026 تک مکمل کرلیا جائے گا۔ انہوں نے کہا کہ اس ماسٹر پلان کے حوالے سے ماضی کا تجربہ رہا ہے کہ اس میں مختلف اسٹیک ہولڈرز کی جانب سے اعتراضات اور اصلاحات آتی رہتی ہیں اس لئے اس ماسٹر پلان جسے گریٹر کراچی ریجنل پلان 2047 ء کا نام دیا گیا ہے، اس کو تمام فورم پر اوپن رکھا گیا ہے تاکہ تمام کی تجاویز اور اصلاحات کو شامل کیا جاسکے، ساتھ ہی اس شہر کے تمام اسٹیک ہولڈرز سیاسی جماعتوں کو بھی آن بورڈ لیا جارہا ہے جو اپنے ایکسپرٹ کے ذریعے اس میں اپنی رائے شامل کروائیں۔ ساتھ ہی اس میں سول سوسائٹی سمیت تمام شعبہ ہائے زندگی سے تعلق رکھنے والوں کو بھی آن بورڈ لیا جارہا ہے۔ سعید غنی نے کہا کہ اس ماسٹر پلان میں مکمل ہاؤسنگ، ٹرانسپورٹ، موسمیاتی تبدیلیوں، انفرااسٹرکچر، پانی، سیوریج اور بڑھتی ہوئی آبادی کو بھی مدنظر رکھا جائے گا، جو آئندہ 20 سال تک ہمارے لئے آسانیاں پیدا کرسکے۔ سعید غنی نے کہا کہ ہماری بھرپور کوشش ہے کہ یہ ماسٹر پلان کسی زبان، علاقہ، اکیڈمی یا سیاسی جماعت یا وزیر کا نہیں بلکہ کراچی کے شہریوں کا ماسٹر پلان ہو۔ انہوں نے کہا کہ مجھے امید ہے کہ ہم اس کو ایک ایسا صاف و شفاف اور تمام مشاورت سے بھرپور ماسٹر پلان بنانے میں ضرور کامیاب ہوجائیں گے، جو اس شہر، صوبے اور ملک کے لئے تاریخی ہوگا۔ سعید غنی نے کہا کہ اب ہمیں ماضی کو بھلا کر مستقبل کی جانب دیکھنا چاہیے۔ کراچی جو روشنیوں کا شہر کہلاتا ہے، ہمیشہ سے ہماری قوم کا دل رہا ہے۔ تاہم، جیسے جیسے یہ شہر بڑھا، اس کے چیلنجز بھی بڑھتے گئے۔ ان چیلنجز سے نمٹنے اور پائیدار ترقی کو یقینی بنانے کیلئے، حکومتِ سندھ نے پاکستان پیپلز پارٹی کی دور اندیش قیادت میں گریٹر کراچی ریجنل پلان 2047 کی تیاری کا آغاز کیا ہے۔ انہوں نے کہا کہ یہ منصوبہ کراچی کو ایک عالمی معیار کا میٹروپولیٹن شہر بنانے کیلئے تیار کیا جا رہا ہے، جو اس کے باسیوں کیلئے ایک بہتر طرزِ زندگی اور آئندہ نسلوں کے لئے ایک روشن مستقبل یقینی بنائے گا۔