شہر بھر میں کے ڈی اے اراضی پر قائم غیر قانونی تعمیرات کو مسمار کرنے کے لئے بھرپور قوت سے آپریشن جاری ہے۔
	17-Dec-2020
	شہر بھر میں کے ڈی اے اراضی پر قائم غیر قانونی تعمیرات کو مسمار کرنے کے لئے بھرپور قوت سے آپریشن جاری ہے۔ ادارہ ترقیات کراچی کا محکمہ اسٹیٹ اینڈ انفورنسمنٹ کا عملہ تمام تر توانائیاں صرف کررہا ہے۔ آپریشن کے کامیاب نتائج حاصل کرنے کے لئے مزید تیزی سے کے ڈی اے اراضی واگزار کرانے کے لئے حکمت عملی تیار کی گئی ہے جس پر من و عن عمل درآمد کیا جارہا ہے۔ ڈائریکٹر جنرل ادارہ ترقیات کراچی کی خصوصی ہدایت پر گزشتہ روز سرجانی ٹائون سیکٹر 8 سائٹ L-T، سیکٹر 7-C ، سیکٹر 6-B، سیکٹر 6-C اور سیکٹر 6 جیلانی ٹائون میں غیر قانونی تعمیرات کو بھاری مشینری کے ذریعے مسمار کردیا گیا۔ سرجانی ٹائون میں قابضین کے خلاف کارروائی ایگزیکٹو انجینئر محسن رضا کی نگرانی میں کی گئی۔ سرجانی ٹائون کے مختلف سیکٹرز میں سرکاری اراضی کو غیر قانونی طور پر استعمال کیا جارہا تھا، متعلقہ اداروں کی طرف سے نشاندہی کے بعد ڈی جی کے ڈی اے نے اراضی واگزار کرانے کے احکامات جاری کئے۔ ادارہ ترقیات کراچی کا کہنا ہے کہ شہر بھر میں بلا تفریق کارروائی کی جارہی ہے، کارروائی کا عمل سو فیصد مطلوبہ نتائج حاصل کرنے تک جاری رکھا جائے گا۔