فیڈرل بی ایریا اور سرجانی ٹائون میں شادی ہالز، کمرشل پلاٹس ، رہائش پلاٹس اور خود ساختہ دل مراد گوٹھ غیر قانونی تعمیر ات بھاری مشینری کے ذریعے مسمار کردیئے گئے۔ڈائریکٹر جنرل ادارہ ترقیات کراچی
	07-Jan-2018
	ڈائریکٹر جنرل ادارہ ترقیات کراچی سمیع الدین صدیقی کی خصوصی ہدایت کی روشنی میں متعلقہ محکمہ اسٹیٹ اینڈ انفورنسمنٹ کا عملہ شہر بھر میں کے ڈی اے اراضی پر قائم غیر قانونی تعمیرات کو مسمار کرنے کے لئے بھرپور قوت سے آپریشن کررہا ہے۔ واضح رہے کہ سپریم کورٹ کی ہدایت اور حکومت سندھ کے تعاون سے ڈائریکٹر جنرل ادارہ ترقیات کراچی سمیع الدین صدیقی کی ذاتی دلچسپی کے باعث بلا تفریق اور کسی قسم کے دبائو کو نظر انداز کرتے ہوئے قبضہ مافیا کے خلاف بڑے پیمانے پر کارروائی کی جارہی ہے جبکہ ڈی جی کے ڈی اے وقتاً فوقتاً محکمہ اسٹیٹ اینڈ انفورنسمنٹ کے ڈائریکٹر سے تفصیلی بریفنگ لے رہے ہیں۔ ترجمان کے مطابق ڈی جی کے ڈی اے کا کہنا ہے کہ خاطر خواہ کامیابیوں کے باوجود تجاوزات کے خلاف آپریشن منطقی انجام تک جاری رہے گا۔ ڈائریکٹر اسٹیٹ اینڈ انفورنسمنٹ کی سربراہی میںفیڈرل بی ایریا اور سرجانی ٹائون سیکٹر 10/1 ، 10/2 اور سیکٹر3 میں شادی ہالز، کمرشل پلاٹس ، رہائش پلاٹس اور خود ساختہ دل مراد گوٹھ جوکہ غیر قانونی تعمیر ات تھے، پولیس، رینجرز اور مقامی انتظامیہ کی موجودگی میں بھاری مشینری کے ذریعے مسمار کردیئے گئے، واگزار کرائی گئی کے ڈی اے اراضی کو محفوظ بنانے کے لئے روزانہ کی بنیاد پر نگرانی نظام نافذ کیا جاچکا ہے۔ ڈائریکٹر اسٹیٹ اینڈ انفورنسمنٹ رضا محمد قائم خانی، ایگزیکٹو انجینئر نارتھ کراچی عارف شاہ، ایگزیکٹو انجینئر سرجانی ٹائون انور عباس و دیگر افسران موجود تھے۔