کورنگی میں قائم تجاوزات کے خلاف بھرپور قوت کے ساتھ بلا تفریق آپریشن جاری ہے۔ ڈی جی کے ڈی اے۔ سمیع الدین صدیقی
	26-Feb-2018
	سپریم کورٹ کے احکامات کی روشنی میں کورنگی میں قائم تجاوزات کے خلاف بھرپور قوت کے ساتھ بلا تفریق آپریشن جاری ہے۔ اس حوالے سے ڈائریکٹر جنرل ادارہ ترقیات کراچی سمیع الدین صدیقی نے خصوصی ہدایات جاری کی ہیں، ڈی جی کے ڈی اے نے کہا کہ شہر بھر میں کے ڈی اے اراضی واگزار کرانے کے لئے آپریشن کیا جارہا ہے جبکہ واگزار اراضی کو قبضہ مافیا سے محفوظ بنانے کے لئے نگرانی کا نظام متعارف کرادیا گیا ہے۔ ڈی جی کے ڈی اے کی ہدایت پر عمل کرتے ہوئے ڈائریکٹر اسٹیٹ اینڈ انفورنسمنٹ رضا محمد قائم خانی کی سربراہی میں کورنگی ٹائون میں تین فیکٹریاں اور متعدد غیر قانونی رہائشی پلاٹس کو پولیس و مقامی انتظامیہ کی موجودگی میں بھاری مشینری کے ذریعے مسمار کردیا گیا۔آپریشن کے دوران اسٹیٹ اینڈ انفورنسمنٹ کے عملہ کو نامعلوم افراد کی جانب سے سخت مزاحمت کا سامنا کرنا پڑا۔ آپریشن کے دوران ڈائریکٹر اسٹیٹ اینڈ انفورنسمنٹ رضا محمد قائم خانی، ایگزیکٹو انجینئرکورنگی ٹائون و دیگر افسران موجود تھے۔