اسپورٹس کمپلیکس میں پارکس کی تزئین و آرائش کو ہنگامی بنیادوں پر مکمل کیا جائے۔ڈائریکٹر جنرل ادارہ ترقیات کراچی سمیع الدین صدیقی
	18-Sep-2018
	ڈائریکٹر جنرل ادارہ ترقیات کراچی سمیع الدین صدیقی نے کہا ہے کہ کھیلوں کی سرگرمیاں وقت کی ضرورت اور اولین ترجیح ہے، کھیلوں میں بہتری کے لئے فوری اقدامات کئے جارہے ہیں۔ یہ بات ڈی جی کے ڈی اے نے گلستان جوہر ST-25 ، بلاک 14 میں کے ڈی اے اسپورٹس کمپلیکس کے دورہ کے موقع پر کہی۔ ڈی جی کے ڈی اے کو کھیلوں کی حالت زار، اسپورٹس پالیسی کی تیاری اور کرکٹ، ہاکی سمیت دیگر کھیلوں کی تمام صورتحال اور حقائق سے متعلق بریفنگ دی گئی جبکہ کھیلوں کے میدان آباد کرنے کی ترجیحات پر بھی آگاہ کیا گیا۔ اس موقع پر ڈی جی کے ڈی اے کا کہنا تھا کہ اسپورٹس کمپلیکس میں جوگنگ ٹریک، کرکٹ نیٹ پریکٹس، باسکٹ بال، خواتین کے لئے جیمز، آل انڈور گیمز اور جدید طرز پر مشتمل منی ہاکی گرائونڈبنانے کے لئے عملی اقدامات کئے جائیں جبکہ اسپورٹس کمپلیکس میں پارکس کی تزئین و آرائش کو ہنگامی بنیادوں پر مکمل کیا جائے۔ انہوں نے مزید کہا کہ سول سوسائٹی پر مشتمل ایک کمیٹی قائم کی جائے جو روزانہ کی بنیاد پر اسپورٹس کمپلیکس کی نگرانی اور کئے جانے والے اقدامات کا جائزہ لیکر تجاویز مرتب کرے گی، مثبت تجاویز پر عملدرآمد کیا جائے گا جبکہ چیف انجینئر رام چند کو اسپورٹس کمپلیکس میں فوری طور پر اسٹریٹ لائٹس نصب کرنے کے احکامات جاری کئے ۔انہوں نے مزید کہا کہ ادارہ ترقیات کراچی شہریوں کو بنیادی اور بہترین سہولیات فراہم کرنے کے لئے مصروف عمل ہے۔ چیف انجینئر رام چند، ڈائریکٹر پارکس شمس صدیقی، ڈائریکٹر اسپورٹس محمد ناصر، ایڈیشنل ڈائریکٹر اسپورٹس ایاز منشی، میڈیا کو آرڈی نیٹر اکرم ستار و دیگر افسران موجود تھے۔