ڈائریکٹر جنرل ادارہ ترقیات کراچی سمیع الدین صدیقی کی خصوصی ہدایت پر محکمہ اسٹیٹ اینڈ انفورنسمنٹ کے عملے نے نارتھ ناظم آبادمیں کے ڈی اے اراضی قبضہ مافیا سے چھڑانے کے لئے کارروائی کی۔
	07-Oct-2018
	ڈائریکٹر جنرل ادارہ ترقیات کراچی سمیع الدین صدیقی کی خصوصی ہدایت پر محکمہ اسٹیٹ اینڈ انفورنسمنٹ کے عملے نے نارتھ ناظم آبادمیں کے ڈی اے اراضی قبضہ مافیا سے چھڑانے کے لئے کارروائی کی۔ تفصیلات کے مطابق نارتھ ناظم آباد میں واقع غیر قانونی فلورنس گارڈن میرج ہال، مہدی میرج لان اور سہیل منصور شادی ہالز کو بھاری مشینری کے ذریعے مسمار کردیا۔ کارروائی ڈی جی کے ڈی اے، ڈائریکٹر اسٹیٹ اینڈ انفورنسمنٹ، مقامی انتظامیہ و پولیس کی موجود میں کی گئی، واگزار کرائی گئی زمین سرکاری تحویل میں لے لی گئی۔اس موقع پر سمیع الدین صدیقی کا کہنا تھا کہ کے ڈی اے اسکیمز اور ٹائون شپس میں تجاوزات کو بالکل برداشت نہیں کیا جائے گا۔ قبضہ مافیا کے خلاف ہنگامی بنیادوں پر آپریشن جاری ہے۔ دوران آپریشن پولیس اور رینجرز سے مدد طلب کی جائے تاکہ کوئی ناخوشگوار واقع رونما نہ ہوسکے، سرکاری اراضی کو قابضین سے چھڑانے کے لئے کارروائی مقامی انتظامیہ، رینجرز و پولیس کے تعاون سے مستقل بنیادوںپر جاری رہے گی۔ شہر بھر میں قائم سرکاری اراضی کو قبضہ مافیا سے واگزار کرانے کے لئے عملی اقدامات کئے جارہے ہیں، بہت جلد اہداف حاصل کرنے میں کامیاب ہوجائیں گے۔ ڈی جی کے ڈی اے نے ڈائریکٹر اسٹیٹ اینڈ انفورنسمنٹ کو ہدایت کی کہ روزانہ کی بنیاد پر واگزار کرائی گئی اراضی کی تفصیلات فراہم کی جائیں اور آپریشن کو منطقی انجام تک پہنچانے کے لئے بلاتفریق مؤثر کارروائی جاری رکھی جائے۔ ڈی جی کے ڈی اے کے ہمراہ ڈائریکٹر اسٹیٹ اینڈ انفورنسمنٹ ورئیل اندھر، ایگزیکٹو انجینئر نارتھ کراچی عارف رضا، میڈیا کو آرڈی نیٹر اکرم ستار و دیگر افسران موجود تھے۔