کے ڈی اے خواتین ہاکی ٹیم کے کھلاڑیوں کا حتمی انتخاب کرلیا گیا ہے۔ ڈی جی کے ڈی اے
	23-Oct-2018
	کے ڈی اے خواتین ہاکی ٹیم کے کھلاڑیوں کا حتمی انتخاب کرلیا گیا ہے۔ ڈی جی کے ڈی اے سمیع الدین صدیقی کی خصوصی ہدایت پر خالصتاً میرٹ کی بنیاد پر ٹرائل کے لئے ملک بھر سے آنے والے کھلاڑیوں میں سے باصلاحیت کھلاڑیوں کا انتخاب کیا گیا ہے۔ کھلاڑیوں کا انتخاب سابق اولمپیئن وسیم فیروز، حنیف خان اور ڈائریکٹر اسپورٹس کی نگرانی میں کیا گیا ہے۔ ٹرائل کے آخری روز ڈائریکٹر جنرل ادارہ ترقیات کراچی سمیع الدین صدیقی بھی موجود تھے۔ انہوں نے منتخب ہونے والے کھلاڑیوں سے مختصر بات چیت کرتے ہوئے کہا کہ خواتین کھیل کے میدان میں بھرپور قابلیت کا مظاہرہ کرتے ہوئے اپنی اور ادارہ کی شناخت بنانے میں اہم کردار ادا کرسکتی ہیں۔ ادارہ بہترین کارکردگی دکھانے والے کھلاڑیوں کو اضافی سہولیات فراہم کرے گا جبکہ کھلاڑیوں کے کھیل میں نکھار لانے کے لئے ملک کے نامور کھلاڑی کوچنگ کے فرائض انجام دیں گے۔ ادارہ ترقیات خواتین کی حوصلہ افزائی کے لئے ہر سطح پر اقدامات جاری رکھے گا۔ ڈی جی کے ڈی اے کے ہمراہ اسماء شاہ، ڈائریکٹر اسپورٹس محمد ناصر، ایڈیشنل ڈائریکٹر ایاز منشی، کراچی ہاکی ایسوسی ایشن کے عہدیداران ، ترجمان ادارہ ترقیات اکرم ستار و دیگر افسران موجود تھے۔
	News Photo Gallery