کشمیر روڈ پر واقع کے ڈی اے کلب اور شادی لان کو بھاری مشینری کے ذریعے مسمار کردیا
	09-Nov-2018
	شہر بھر میں کے ڈی اے اراضی پر قائم غیر قانونی تعمیرات کو مسمار کرنے کے لئے بھرپور قوت سے آپریشن جاری ہے۔ ادارہ ترقیات کراچی کا محکمہ اسٹیٹ اینڈ انفورنسمنٹ کا عملہ تمام تر توانائیاں صرف کررہا ہے جبکہ ڈائریکٹر جنرل کے ڈی اے سمیع الدین صدیقی بذات خود آپریشن کی مانیٹرنگ کررہے ہیں۔ آپریشن کے کامیاب نتائج حاصل کرنے کے لئے مزید تیزی سے کے ڈی اے اراضی واگزار کرانے کے لئے حکمت عملی تیار کرلی گئی ہے جس پر من و عن عمل درآمد کیا جارہا ہے۔ سپریم کورٹ کے احکامات کی روشنی اور ڈائریکٹر جنرل ادارہ ترقیات کراچی سمیع الدین صدیقی کی خصوصی ہدایت پر گزشتہ شب کشمیر روڈ پر واقع کے ڈی اے کلب اور شادی لان کو بھاری مشینری کے ذریعے مسمار کردیا گیا، اس موقع پر ڈی جی کے ڈی اے سمیع الدین صدیقی اور ڈائریکٹر محکمہ اینڈ انفورنسمنٹ ورئیل اندھر اور ترجمان ادارہ ترقیات اکرم ستار بھی موجود تھے۔ کے ڈی اے کلب و شادی لان میں عرصہ دراز سے غیرقانونی تقریبات جاری تھیں، سرکاری اراضی کو غیر قانونی طور پر استعمال کیا جارہا تھا، متعلقہ اداروں کی طرف سے نشاندہی کے بعد ڈی جی کے ڈی اے نے اراضی واگزار کرانے کے احکامات جاری کئے۔ ڈائریکٹر جنرل کے ڈی اے کا کہنا ہے کہ شہر بھر میں بلا تفریق کارروائی کی جارہی ہے، کارروائی کا عمل سو فیصد مطلوبہ نتائج حاصل کرنے تک جاری رکھا جائے گا۔کے ڈی اے اسکیموں اور ٹائون شپس میں قائم تجاوزات کے خلاف بغیر کسی دبائو کے آپریشن کیا جارہا ہے ،شہر بھر میں قابضین کے خلاف مؤثر کارروائی جاری ہے بہت جلد اہداف حاصل کرنے میں کامیاب ہوجائیں گے۔ آپریشن کے کامیاب نتائج حاصل کرنے کے لئے مزید تیزی سے کے ڈی اے اراضی واگزار کرانے کے لئے حکمت عملی تیار کرلی گئی ہے جس پر من و عن عمل درآمد کیا جارہا ہے۔
	News Photo Gallery