قابضین سرکاری زمینیں ازخود خالی کرلیں بصورت دیگر رینجرز، پولیس، مقامی انتظامیہ کے تعاون سے قبضہ مافیا کے خلاف سخت ایکشن لیاجائے گا۔ ڈائریکٹر جنرل ادارہ ترقیات
	13-Jan-2019
	ڈائریکٹر جنرل ادارہ ترقیات کراچی سمیع الدین صدیقی نے کراچی ڈیولپمنٹ اتھارٹی کے تحت جاری انہدامی کارروائیوں کا سلسلہ تیز کرنے کے احکامات جاری کرتے ہوئے کہا کہ گزشتہ برس سے جاری انسداد مہم کے دوران اربوں روپے مالیت کی سرکاری اراضیاں قبضہ مافیا سے واگزار کرائی جاچکی ہیں۔ یہ بات ڈی جی کے ڈی اے نے ڈائریکٹر اسٹیٹ اینڈ انفورنسمنٹ دلدار حسین شاہ سے ملاقات کے دوران کہی۔ ترجمان کے ڈی اے کی جانب سے جاری کردہ اعلامیہ کے مطابق سمیع الدین صدیقی نے واضح کیا کہ قابضین کان کھول کر سن لیں، سرکاری زمینیںازخود خالی کرلیں بصورت دیگر رینجرز، پولیس، مقامی انتظامیہ کے تعاون سے قبضہ مافیا کے خلاف سخت ایکشن لیاجائے گا اور ہیوی مشینری کے ذریعے غیر قانونی تعمیرات منہدم کرکے اراضیاں سرکاری تحویل میں لی جائیں گی، بیشتر مواقع پر قبضہ مافیا کی جانب سے سخت مزاحمت کا سامنا رہا مگر اس کے باوجود ادارہ ترقیات نے کارروائیاں جاری رکھیں بلکہ کارروائیوں کا سلسلہ شہر بھر میں پھیلایا۔ ڈی جی کے ڈی اے نے مزید کہا کہ سپریم کورٹ نے آئندہ سماعت کے موقع پر کراچی ڈیولپمنٹ اتھارٹی سے آپریشن کے دوران واگزار کرائی جانے والی اراضیوں کے بارے میں تفصیلات طلب کی ہے، محکمہ اسٹیٹ اینڈ انفورنسمنٹ 7 دن کے اندر اب تک کی جانے والی انہدامی کارروائیوں کے بارے میں تفصیلی رپورٹ مرتب کرکے آگاہ کرے۔ ادارہ ترقیات آئندہ سماعت پر شہر بھر میں قائم کے ڈی اے اراضیاں قبضہ مافیا سے چھڑانے کی تفصیلی رپورٹ پیش کرے گا۔ ڈی جی کے ڈی اے سمیع الدین صدیقی کی سربراہی میں اور مشینری و افراد ی قوت کی کمی کے باوجود تجاوزات کے خلاف آپریشن منطقی انجام تک جاری رہے گا۔ ملاقات کے موقع پر چیف انجینئر رام چند، ڈائریکٹر لینڈ آصف علی میمن، ڈیمالش آفیسر سعید خان، ترجمان اکرم ستار و دیگر افسران بھی موجود تھے۔