کورنگی نمبر ساڑھے 5 میں محکمہ اسٹیٹ اینڈ انفورنسمنٹ نے 300 سے زائد دکانیں و پختہ تعمیرات کو مسمار کیا۔ ادارہ ترقیات کراچی
	16-Jan-2019
	ادارہ ترقیات کراچی کی جانب سے انہدامی کارروائیوں کا سلسلہ تیزی سے جاری ہے۔ کے ڈی اے محکمہ اسٹیٹ اینڈ انفورنسمنٹ کا عملہ بلا تفریق قابضین کے خلاف مؤثر آپریشن کررہا ہے۔ سپریم کورٹ کے حکم کی پاسداری کرتے ہوئے ڈائریکٹر جنرل ادارہ ترقیات کراچی سمیع الدین صدیقی نے کہا کہ غیر قانونی تعمیرات کے خلاف آپریشن جاری ہے۔ غیر قانونی تعمیرات کرنے والوں کو کچھ عناصر کا آشیر باد حاصل ہے اس کے باوجود کے ڈی اے عملہ دبائو کو نظر انداز کرکے افسران و ملازمین قابضین کے خلاف مؤثر کارروائیوں میں مصروف عمل ہیں۔ انہوں نے ڈائریکٹر اسٹیٹ اینڈ انفورنسمنٹ کو ہدایت کی کہ خاطر میں لائے بغیر سرکاری اراضی واگزار کرنے کا عمل جاری رکھا جائے۔ مشینری قوت اور فنڈز کی کمی کے باوجود محکمہ انسداد و تجاوزات نے 90 فیصد سے زائد تجاوزات کا خاتمہ کردیا ہے، مطلوبہ نتائج حاصل کرنے تک آپریشن جاری رہے گا اس کے ساتھ ساتھ یقینی بنایا جارہا ہے کہ مستقبل قریب میں واگزار کرائی گئی اراضی پر تجاوزات قائم نہ ہوں۔تفصیلات کے مطابق آج کورنگی نمبر ساڑھے 5 میں محکمہ اسٹیٹ اینڈ انفورنسمنٹ نے دو روزہ کارروائی کا آغاز کرتے ہوئے 300 سے زائد دکانیں و پختہ تعمیرات کو مسمار کیا۔ خیال رہے کہ رواں ماہ مذکورہ مقام پر قابضین کے خلاف آپریشن کرتے ہوئے 700 سے زائد دکانوں کا مکمل خاتمہ کیا جاچکا ہے۔ گرینڈ آپریشن کا دائرہ وسیع کرتے ہوئے سیکورٹی اداروں کی موجودگی میں آج مزید 300 سے زائد دکانیں سمیت گودام و پختہ تعمیرات کو منہدم کردیا گیا۔ آپریشن ڈائریکٹر جنرل کے ڈی اے سمیع الدین صدیقی کی نگرانی میں عمل میں آیا، آپریشن کے دوران ڈائریکٹر اسٹیٹ اینڈ انفورنسمنٹ دلدار حسین شاہ، ڈیمالیشن آفیسر سعید خان، اسسٹنٹ ڈائریکٹر انکروچمنٹ سیل خرم شہباز، ترجمان ادارہ ترقیات اکرم ستار و دیگر افسران بھی موجود تھے۔
	News Photo Gallery