ایک برس کے دوران 200 کے قریب گرائونڈز واگزار کراکے سرکاری تحویل میں لئے گئے، ڈائریکٹر جنرل ادارہ ترقیات کراچی
	19-Jan-2019
	ڈائریکٹر جنرل ادارہ ترقیات کراچی سمیع الدین صدیقی نے کہا ہے کہ ادارہ کھیلوں کے فروغ کے لئے بھرپور تعاون جاری رکھے گا، میدانوں کو آبادکرکے کھیلوں کے ذریعے نوجوان نسل کو صحتمندانہ سرگرمیوں کی طرف راغب کیا جاسکتا ہے۔ 45 سے زائد کھیل کے میدان آباد کئے جاچکے ہیں جبکہ بحالی کا عمل جاری ہے، رواں ماہ مزید 20 سے زائد میدانوں کو اصل شکل میں لایا جائے گا۔ گزشتہ 20 برس سے کے ڈی اے اسپورٹس گرائونڈز پر قبضہ مافیا کا راج تھا،تجاوزات کا خاتمہ مشکل ہدف تھا جبکہ مشینری و افرادی قوت کا فقدان بھی موجود ہے اس کے باوجود صرف ایک برس کے دوران 200 کے قریب گرائونڈز واگزار کراکے سرکاری تحویل میں لئے گئے، یقینا ادارہ کا یہ اقدام غیر معمولی ہے جس کے باعث عوامی سطح پر پذیرائی حاصل ہوئی۔سندھ حکومت، وزیر بلدیات سندھ، کمشنر کراچی، سابق قومی کھلاڑیوںکی حمایت و تائید سے ادارہ ترقیات کے میدان آباد ہورہے ہیں، آنے والے وقت میں کے ڈی اے گرائونڈز جدید طرز کی سہولیات سے آراستہ کرکے کھلاڑیوں کو زیادہ سے زیادہ سہولیات کی فراہمی یقینی بنائی جائے گی۔ ان خیالات کا اظہار ڈی جی کے ڈی اے نے گزشتہ روز YMC گرائونڈ میں جاری نمائشی ہاکی میچ کے دوران میڈیا نمائندوں سے مختصر بات چیت کرتے ہوئے کیا۔ اس موقع پر کمشنر کراچی افتخار درانی، اسپورٹس ایڈوائزر جنید علی شاہ، کراچی ہاکی ایسوسی ایشن کے جنرل سیکریٹری حیدر حسین، سابق اولمپیئن سمیع اللہ اور حنیف خان، ایڈیشنل ڈائریکٹر اسپورٹس ایاز منشی، ترجمان کے ڈی اے اکرم ستار سمیت دیگر افسران موجود تھے۔ ہاکی میچ کمشنر کراچی الیون اور پریذیڈنٹ KHA ہاکی ٹیموں کے درمیان کھیلا گیا۔ دونوں ٹیموں نے شاندار کھیل کا مظاہرہ کیا جس کی بدولت میچ کا اختتام برابری پر ہوا۔